1.வானாடர் கோனு மலரோனு மாலோனுங்

கானாடு கின்றநுதற் கண்ணோனுந் - தாநாட

2.மாட்டார் மதிமயங்கி மாமறையி னீறுகளுந்

தாட்டா மரைதேடித் தானரற்றச் - சேட்டார்

3.முனிவரெலாங் காணார்போய் முந்நீரி னுள்ளே

பனிவருங்கா லத்துப் படிந்துந் - துனிபெருகுங்

4.கோடையினில் வெய்ய கதிருங் கொடுந்தீயும்

பாடு மெரியப் பதைபதைத்தும் - வாடித்

5.தலைகீழாய் நின்று தபித்துச் சலமோ

டிலைகாய் கிழங்குகாற் றெய்திற் - றலமாகக்

6.கொண்டயின்றுங் காடுங் குமிடு மிடமாகக்

கண்டுயின்று மிங்ஙனே காயத்தைக் - கொண்டு

7.படக்கடவ வெத்தனையும் பட்டாலும் பட்டு

விடக்கடவ ராக விதித்திங் - கடற்புலன்க

8.ணீத்தார்க டங்க ணினைவுங் கடந்தகமே

பார்த்தார்க் கதிதூரப் பட்டிருண் - டேத்துவார்க்

9.கின்ன தெனவறிய வில்லா வியல்பதனா

லன்ன வரையு மயர்ப்பித்துத் - தன்னுருவ

10.மாணென்ன வன்றி வலியென்னப் பெண்ணென்னப்

பேணும் வகையின்றிப் பேசுங்காற் - காண

11.வொருவழியு மின்றி யுரையுணர்வுக் கெட்டாத்

திருவடிவை யுள்ளங்கைச் சேர்ந்த - தொருகனிபோற்

12.கண்டோமென் பார்காட்சி யாவையுங் கைகடந்

துண்டோ விலதோவென் றோர்வுமறத் - திண்டாடப்

13.பண்ணிப் பரம கருணையினா லோருருவாய்

நண்ணித் திருஞான நாட்டத்தைத் - திண்ண

14.மளித்திடினு மன்பர்க் ககமதிப்பின் முன்வந்

தொளிப்படுமா போலே யொளித்தும் - வெளிப்படா

15.யெம்பிரா னென்றிரந்தும் யாவர்க்கு மெய்தரிய

தம்பிரா னாயேற்கித் தாரணிக்கே - செம்பொற்

16.கழல்காட்ட வாகமெலாங் கண்ணாகக் காணே

னழல்காட் டியமெழுகே யாகே - னெழில்போற்ற

17.வாயா யிரங்காணேன் மாறாப் பெருங்களிவந்

தோயா துருகு முளங்காணேன்- காயம்

18.புரையுள்ள வெல்லையும்போய்ப் பூரிக்கக் காணேன்

கரையுந் திறந்தானுங் காணேன் - றிரைகொண்ட

19.வாழிபோ லார்த்தோங்கி யாகாயத் தோடுநில

னேழையே னாலித் தெழுந்துவிழேன் - வாழே

20.லுருகேன் பெருகே னுடையானே யுன்னிப்

பருகேன் பரவேன் பதையே-னொருகால்

21.விழிபனியேன் வெய்துயிரேன் மெய்சோரேன் விம்மே

னெழிவறவே நின்றுருக்கி யூனைக் - கழிவுறவே

22.பாரேன் பயந்துள்ளம் பாதாதி கேசமுற

வேரேன் வியவேன் விதிர்விதிரே - னீராய்க்

23.கரையே னெனதுடலங் கம்பிக்கக் காணேன்

விரையேன் மலர்ப்பதத்தே வீழே -னுரையுங்

24.குழறேன் தழுதழுத்துக் கூத்தாடே னெஞ்சைக்

கழறேன்கண் ணீர்சொரியக் காணே - னுழரே

25.னொளியே யடியே னொருவியப்புங் காணேன்

களியேனான் செய்யும்வகை காணேன் - றெளிவிலே

26.னாற்ற வறிகிலே னத்தா கழல்போற்றி

தோற்று சுரூபச் சுடர்போற்றி - நாற்றிசையுங்

27.கீழ்மேலு மெங்குங் கிளரொளியா யப்புறம்போய்ச்

சூழ்மேவி நின்ற சுடர்போற்றி - யூழ்மேவு

28.காயங் கரைவித்த கண்போற்றி காற் றியமான்

றோயந் தரைவிண் சுடர்மூன்று - மேய

29.வருவித்த வல்லபம் போற்றி யவைமாற்

றொருவித் தகம்போற்றி யுன்னைத் - தெரிவித்த

30.வாபோற்றி நின்னை வளைவோ ருளம் விட்டு

நீபோக் கிலாத நிலைபோற்றி - தீபத்

31.தொளியின் றெளிவாய வோருருவம் போற்றி

களியொன் றியகழல்கள் போற்றி - யெளிவந்து

32.பேயேனை யாண்டு பிழைபொறுத்தென் பேதைமையை

நீயே தவிர்க்கு நெறிபோற்றி - தாயேயென்

33.றந்தையே போற்றி தமியேனை யாட்கொண்ட

வெந்தையே யீசா விறைபோற்றி - பந்த

34.மறுத்தானே போற்றி யடியேன் பிறப்பை

வெறுத்தானே போற்றி வினையான் - மறுத்துன்

35.றிருவருணோக் காலெனது சித்தந் திரித்த

வொருவிரகே யுத்தமனே போற்றி - பருகமிர்த

36.மானானே போற்றி யடிநாயே னெஞ்சிடையே

தேனாகித் தித்திக்குஞ் சீர்போற்றி - யானா

37.ரவனியின் வந்தாள வாற்றுகிலேன் போற்றி

சிவனயன்மா லாந்தேவே போற்றி - தவமிலியே

38.னென்செய்தேன் போற்றி யிறைபோற்றி யெப்பொருட்கு

முன்செய்தா னேமுழுது நீபோற்றி - நின்செயலிங்

39.காரறிவார் போற்றி யனைத்துமா யல்லாத

பேரறிவே போற்றிவெறும் பேயேற்குப் - பாரறியத்

40.தந்தாய் மலர்ப்பாதந் தம்பிரா னேபோற்றி

சிந்தா குலந்தவிர்த்த சீர்போற்றி - கொந்தாருந்

41.தாளிணைகள் போற்றி தரிக்கிலேன் காண்போற்றி

யாளெனையுங் கொள்வதழ கோபோற்றி - மாளாமே

42.காத்த கழல்போற்றி நாயேன் கவலையெலாந்

தீர்த்த விழியின் றிறம்போற்றி - வார்த்தை வெறு

43.மொன்றாலே யெண்ணிறந்த வூழிவரு மென்பவத்தைக்

கொன்றானே போற்றி குறிபோற்றி - பொன்று

44.மிதமோ டகமேவு மென்மயலை மாய்த்த

மதஞான வாரணமே போற்றி பதகக்

45.கலையோ தலைவலைகள் காண்டற் கரிய

நிலையேயென் னின்மலனே போற்றி - சிலைபோலு

46.மென்னெஞ் சினைநெகிழ்த்த தென்செய்த வாபோற்றி

முன்னஞ்செய் தாய்மூர்த்தி யேபோற்றி - யின்னந்

47.தெளிகிலேன் போற்றி தெளியாத வென்னை

விளிகிலேன் வித்தகனே போற்றி - யளிபவர்த

48.முள்ளத் தமிர்தே யுடையானே யோபோற்றி

தெள்ளத் தெளிவே செயபோற்றி - கொள்ளக்

49.குறைவிலா வின்பக் குணக்கடலே போற்றி

யிறைவனே யென்னுரைக்கேன் போற்றி - முறையோ நான்

50.கைம்மாறு காணேன் கருணைப் பெருங்கடலே

யம்மானே போற்றி யடிபோற்றி - பொய்ம்மாயந்

51.தீர்த்தாய் பிரானே பிரானே செயபோற்றி

காத்தாய் கருணா கரபோற்றி - மூர்த்தியே

52.மூலமே போற்றி முழுதழிய வுள்புகுந்த

கோலமே போற்றியெனைக் கோப்பழித்த - சீலத்தின்

53.வித்தகமே போற்றி வினையேனை நின்றுருக்கு

முத்தமனே போற்றியுடை யாய்போற்றி - பத்திக்

54.கடலா மடியவர்முன் காசினிமேன் மாய

வுடலா னதைநானென் றுன்னி - யடலார்

55.புலனெறியே போவேனைப் புண்ணியநீ யாள்கை

நலனதுவே நாயகனே போற்றி - சலமதிபோ

56.னின்று குலைகுலையு நெஞ்சந் திரித்தவிர

கொன்று மறியே னுரையிறந்த - குன்றமே

57.போற்றி புனிதாநின் பொற்கழலே யெப்பொழுதுஞ்

சாற்ற வளித்த சதுர்போற்றி - தோற்றமெலா

58.நீயேகாண் போற்றி நினைவணங்கா தாரெல்லாம்

பேயேகாண் போற்றிவெரும் பித்தனே - னாயேனான்

59.சொல்லும் வகையறியேன் சோத்தெம் பிரான்போற்றி

கல்லு மனங்கரைத்த கண்போற்றி - யல்லும்

60.பகலு மடியேனை யாண்டவா பார்மேற்

புகலும் வகையருளாய் போற்றி - சகலமு

61.முன்னிற் பிறந்திறக்க வொன்றிற் பிறந்திறவாத்

தன்னந் தனியேநின் றாள்போற்றி - யென்னொப்பி

62.லென்னையாட் கொண்ட விறையே முறைபோற்றி

முன்னையாய்ப் பின்னாய் முழுதுமாய் - மன்னும்

63.பொருளாய பூரணனே போற்றிதாள் போற்றார்க்

கிருளா யிருப்பவனே போற்றி - யருளேது

64.மற்றேன்காண் போற்றி யடியே னடையவுனைப்

பெற்றேன் பிழைத்தேன் பெருமானே - சிற்றின்பம்

65.வேண்டாவேண் டாபோற்றி வெவ்வினையே னுள்ளுருக்கி

யாண்டானே போற்றி யடிபோற்றி - தூண்டுசுடர்ச்

66.சோதி துறந்தோர் துணையே கழல்போற்றி

யாதி யறிவே யருள்போற்றி - பேதையேன்

67.றோழாநின் செம்பொற் றுணைமலர்த்தாள் காணாநான்

வாழேன்காண் போற்றி மதிபோற்றி -யேழையே

68.னாற்றுகிலேன் போற்றி யருளாய் கழல்போற்றி

தேற்றமெனக் குன்சே வடிபோற்றி - போற்றி

69.சுரூபானந் தச்சுடரே யென்றுணையே போற்றி

திருவேயென் செய்தவமே போற்றி - கருவாய

70.மூலமே போற்றி முடிவே யடிபோற்றி

ஞாலமே விண்ணே நலம்போற்றி - தூலமே

71.நுண்மையே போற்றிமிகு நுண்ணுணர்வோர் தங்கருத்தி

னுண்மையே போற்றி யொளிபோற்றி - கண்மேவிக்

72.காண்பதெலா நீயொழியக் காணேன் கழல்போற்றி

பூண்பதினி யுன்பொற் கழல்போற்றி - யாண்பெணலி

73.யல்லானே போற்றி யடியேன் பிழை பொறுக்க

வல்லானே போற்றி மதியிலேன் - பொல்லாதே

74.னென்றறிந்து மாட்கொண்டாய் போற்றிநீ யெவ்விடத்து

நின்றறிந்த நின்மலபோ தம்போற்றி - யொன்று

75.மறியே னுடையா யடைக்கலநான் போற்றி

சிறியே னிடர்சிதையாய் போற்றி - குறியேது

76.மில்லாத வின்பப் பெருங்கடலே யேத்தினர்க்கு

நல்லா யெனையா ணயம் போற்றி - பல்லாண்டு

77.போற்றி சயசய பல்லாண்டு பல்லாண்டு

சீர்த்திற மேதுந் தெரியாதேன் - றோற்றியவா

78.விண்ணப்பஞ் செய்தவிது வேதங்கள் கண்டுதுதி

பண்ணப் பெறாதமலர்ப் பாதத்தே - நண்ணுமே

79.யென்போல வெல்லாப் படியாலுங் கீழெனக்கு

முன்போ ருயிரில்லை முற்றுணரிற் - பின்பு

80.முளதாகா திப்பரிசே யுள்ளேனை யாண்ட

பளகாவென் பாக்கியமே போற்றி - யுளகாலங்

81.கொண்டாடி நாவுன் குணம்பரவ நின்கோலங்

கண்டார நாயேன்றன் கண்ணிரண்டு - மண்டாநின்

82.கீர்த்தியினை யெப்பொழுதுங் கேட்டென் செவியுவப்ப

மூர்த்தி கழலே முடிசூட - வேத்துதற்கு

83.வானவருங் காணாத மாணிக்கப் பாதமலர்

ஞான மணம்பருக நாசியென - தூனடைய

84.வுள்ளமாய் நின்றுருக வோருடம்புங் கண்ணாகி

வெள்ளமாய் நீர்சொரிய நான்வியப்ப - வள்ளலே

85.யுன்னடியா ரேவற் றொழிலுவந்து நான்செய்யப்

பொன்னடிதா போற்றி புகழ்போற்றி -யின்ன

86.மதுவே யிரக்கின்றே னாயிரங்கால் போற்றி

யிதவே பெறிலடியே னென்றுங் - கதியேது

87.மில்லாப் பிறவியிலே யென்றும் பிறந்தாலும்

பொல்லாதென் றீதே புரிபோற்றி - கல்லாக்

88.கயவேனை யாண்ட கருணைக் கடலே

செயபோற்றி செம்பொற் கழல்.